Bôt ba mbéna kal le u ga ba maséé inoñnaga ni i nya i boña woñ a nkobol mam mis moñ ma ntehe. Inyu hale nyen, i jam li kôli kônha me maséé, li nla ti numpe ndutu.

I ngéda nu u nkwo, ndi u telep, wetama nyen u ntep kii u ntééda i ño woñ : mbek tole litelbak. Inyu hala nyen i ngéda di nkwélél mam més ma bon ba basaa, ngim bôt i ntehe le mam ma téé longe, bape ba tehge le di yé i wo.

Ngim nwii ini i ntagbe, di nkwel ngandak i mam munu i litenlibassa.com. Ndi jôka li ngéda, minkwel mwés mi yôni ni njelel : mambai més ma nhol bé, di mpot habé hop wés, di mbégés bayambe bape, di ngwéhna bé... Yak jomol di bi nomol munu i homa nunu. I bale di bé mbom ni mbom ki bikut bi bi léña... umbe ntén libag li man basaa di bi unda nkoñ isi munu i homa wés le litenlibassa.com?

Umbe ntén libak li man basaa di nlama unda nkoñ isi i nwii mi nlo ?

I biloñ bi bakana, ngim mihindô i bi waa le higi kel, batjam minañ ba ñôbôs libag jap : ba unda ndik mihindô nwet mi gwé bé mapep, bet ba boñ dimama dibe, bet ba gwé bé bôlô. Ba unda ndik ngoo yet i yé i mambai més, ndi ba ta undga bé bet ba bi nigil kaat ngandak, bet ba nlona biloñ gwap nkus, ba ta undga bé minloñ milam ni mandap malam ma mambai més. Jon bet ba nyéñ bé maliga ni mis map ba nhoñol le i Afrika, di niñ kii binuga. Mihindô mi bi tehe bañ hala, mi jôp i jimb, mi bôdôl pémés minkuu mi bititii, mi mahop, ni mapep ma minañ inyu unda mam malam ma biloñ gwés, bon bés ba ba nyi kaat, maboñok ni matehge ma nkoñ isi i pes Afrika. Liké li ngi yé ntandaa, ndi limut li yé i héñha mahoñol map, inyule li ntehe Afrika ni jis li mondo (i ngéda nu ba ngwés).

Yak bés bon ba basaa di neembe le beñge mam més ni jis li mondo, le ndi yak bôt bape ba ga tehe bés nya ipe, nya i i nlémél bo. Di pot mam més ni ilémb hi mondo, ndi yak bôt ba ga ngwes i mam ba nok i kolbaga ni bés.

I pot mam malam li nkobla bé le di nlama bé jo sañ inyu ikonde ke ni bisu. Ndi hala a nkobla le di waa yan bésbomede, ni nson wés. Di ti lôk’kéé yés i i mpigda ni bôlô makénd, di añlak miñan milam inyu yap, di tinak bo lipém.

Ni ki le hi wada wés a nlama yila ngwégwét inyu litén. Hala we, i ngeñ a ntehe jam lokôdi, i lo a mba a nlond jo ni mbok yosôna, nyemede a yéñ njel i kodol jo. Ibale a nla bé a sébél manyañ.

Mam momasô ma téé bé - ngim mbok i mam momasô ma téé i ta bé- ndi bon ba basaa ba yé i nson, jon me nlama tôp mbôgi ilam ni itééda bot’ñem.